Gresbeck: Easter deliverance (Low German)

Nu heft Stutenbernt mit dem konninck und mit den predicanten einen anderen anschlach furhanden gehat. So heft Stutenbernt ein bock gemackt, wilcker bock is gnant Restitution. Und hebbet dat boick ouck laten drucken, und hebben dat gesant in Hollant und Frieschlant, und worpen do datselve boicke in dat leger fur dat blochuiss, und steken die bocker up stocke und satten sie bei nachte fur dat blochuiss, dat sie die lansknecht solden kreigen, und meinden die lansknecht von dat blochuiss tho kreigen in die stat. Mehr dieselve boicke wolden nicht helpen. So sint dieselve boden widder gekhomen, die sie mit den boeken hedden uth geschicket, und hebben do breve uth Hollant und Frieschlant gekregen, dat sie sick dair versammelt hedden und wolden na Monster khomen und wolden sie entsetten und wolden proviande mede brengen. Do die breve sein gekhomen, do heft der koningk grote oppenbaringe kriegen von Got, dat do die verloesinge solde sin up paischen. Dat hat der koningk in der gemeinheit verkundigt up dem marckede in der predicate, und hadde der koningk fur sick stain einen lansknecht, den hadde hei laten hollen uth der gefengkniss, und wolde ime laten dat hoevet af schlain. Und derselve knecht was des konnighs scherrer. So wolde derselve knecht von dem konnigh und wolde tho huiss trecken, und was von dem konnigh urlof begeren, und dat hei ime mede solde geven ter gelt. So heft der koningk tho dem knecht gesacht „Du heft noch ter gelt.“ Der knecht heft gesacht „Ick en hebbe gein gelt.“ Der konningk heft widderumb gesacht „Warumb leugstu?“ Der knecht heft gesacht „Dat ick liege, so houwet my den kop af.“ So heft der koningk denselven knecht besehn, wehr hei ouck gelt bei sick hadde. Do heft der koningk bei dem knecht gefunden twe Joachimsdaler und ander kleine gelt. Dair moiste derselve knecht umb steryen. Wante derselve knecht was verraden an dem konnigk, dat hei noch gelt hadde. Als nu der konnigk hat gesacht, dat tho paischen solde die verloesunge sin, und sacht: „Iss it sacke, dat tho paeschen die verloesunge nicht en kompt, so doit my als ick diesem selven boesswicht wil doin, der hir fur my steit, und hauwet my ouck dan den kop af.“ Derselve knecht was gein boesswicht, hei hadde gern von dem boesswicht, dem koningk, gewest. Do hebben die arme leut al war gemeint, dat tho paischen solde die verloesunge khomen. Und ein deil luede wolden des nicht loeven, dat die verloesunge solde tho paischen khomen. So heft dieser selve knecht up seine kneen gefallen fur den konnigk und heft gnade begert, und hett al dat volck in der gemeinheit gebetten, dat sie wolden fur innen bidden. Die gnaden doer iss tho gebleven. Derselven sint so viel fur den konnigk up die kneen gefallen, mehr sie en konden gein gnade erlangen, dat die gnaden doer altiet tho was. So was die gnaden duer ock up dat leste mit dem konnigk tho. So heft der konnigk den knecht fur die porte laten brengen und heft ime dat hoevet laten af hauwen, umb der tweer Joachimsdaler willen, und dat hei gesacht hadde: „Is it sacke, dat ick liege, so howet my den kop af.“